सरावण आयो रे-सरावण आयो रे

काळी वादळई खऽ भूरो वद्दळ पल्लो बाँधी लायो रे
सरावण आयो रे- सरावण आयो रे- सरावण आयो रे
काळी वादळई छे नखराळी
छम्म-छमाछम-छमकऽ
बिजली ओकाऽ नैन कटीला
चम्म-चमाचम-चमकऽ
लुकाछिपी का खेल मऽ अंबर नऽ सूरज दपड़ायो रे
सरावण आयो रे-सरावण आयो रे-सरावण आयो रे
नद्दी-नाळा चल्या झूमता
चारई खूट छे पाणी
असो लगज कि जादा खुस छे
इंदर नऽ इन्द्राणी
मइनत रंग लावगऽ अबकी वरसुंद्या नऽ गायो रे
सरावण आयो रे- सरावण आयो रे-सरावण आयो रे
ऊच्ची डाल पऽ बांध्यो झूलो
श्याम-राधिका झूलऽ
देखी नऽ या प्रेम की झाँकी
राही रास्तो भूलऽ
डरऽ राधिका मन का मन मऽ श्याम नऽ
असो झुलायो रे
सरावण आयो रे-सरावण आयो रे-सरावण आयो रे

- हरीश दुबे